"علشان متنضربش على قفاك " الفصل الرابع

"علشان متنضربش على قفاك " الفصل الرابع

مقدمه لابد منها :-

·        فى الفصول التاليه نقدم لحضراتكم ملخص لبعض الافكار التى وردت فى كتاب العقيد عمر عفيفى عن كتابه " علشان متنضربش على قفاك " له منا كل الشكر والتقدير والاحترام , وايضا بعض المواثيق الدوليه لحقوق الانسان .

·        يعنى ببساطه إزاى محدش يلهف حقك , وتعرف كويس ايه اللى ليك وإللى عليك فى مركز الشرطه وتعرف حقوقك التى يكفلها لك  الدستور والقانون  ..

·        يعنى من غير مقدمات كتيره تعمل ايه لو حد وقفك فى الشارع وقالك بطاقتك , وكمان لو حاول يفتشك تعمل ايه , وكمان لو حاول ياخدك على القسم تروح معاه ولا لا وايه حقوقك وصلاحياته  .

·        يعنى ببساطه هتتصرف ازاى لو حد من الشرطه جه وخبط على باب بيتك ده لو مكانشى اتكسر وقالك عندنا امر بالتفتيش ...هتعمل ايه ؟ ... هتعمل ايه ؟  لو كان فتش وتعنت فى تكسير محتويات البيت .. أو انك اكتشفت ان فلوس او شئ ثمين أختفى بعد التفتيش هتعمل ايه ؟؟ ... كمان إذن التفتيش شكله إيه ومختوم ولا لا

·         تعمل ايه لو حاول حد يفتش بنتك او زوجتك تفتيش زاتى ... وهتعمل ايه ؟ لو اخذ امك او بنتك مكانت لحد ما ترجع وتسلم نفسك ليهم .

·        وكمان مين من حقه يشوف رخصه القياده ومين من حقه يسحبها .. وهل لازم  تاخذ ايصال بالرخصه .

·        هتتصرف إزاى  لو حد إتحرش  باسرتك او باختك او زوجتك أو بنتك ..

·        تعمل ايه لو حد من الشرطه شتمك او ضربك او أهانك ...وهتعمل ايه ؟ لو حاول يلفق ليك تهمه مثلا يعنى حاول يتهمك بانك حرضت على بناء سد النهضه أو انك مسؤل مسؤليه كامله عن تغير المناخ على كوكب الارض مثلا يعنى !!!!

·        ماذا تعرف عن  حقوقك فى قسم الشرطه ... وازاى تعمل محضر لضابط شرطه معتدى

·        هتتصرف ازاى  ؟ لو احد اقرباءك مات جوه القسم من الدلع والرفاهيه اللى شافهم  وإزاى تجيب حقه ؟

·        اكيد سمعت عن حقوق الانسان .. وطبعا الكلام ده مش للى لابسين بدل وكرافتات واللى عارفين حقوقهم قوى .. وعلشان كده معمولهم الف حساب لقفــــاهــــم ... لكن كلامنا للناس الغلابه اللى مش عارفه حقها فين .. ولازم تعرفه بالضبط علشان لو مدورتش على حقك وسعيت له لان تجد من يسعى لك فى حقك , فلا تلوم إلا نفسك , لان زى المال السايب ما بيعلم السرقه كذالك الحق السايب يعلم الفساد والفرعه للطرف الاخر .

·       كمان برضو نشكر رجال الشرطه على اللى بتعمله كتير منهم بيضحوا بحياتهم علشانك انت وبيتك تعيشوا فى سلام ... يعنى ببساطه أنت هتكون مبسوط لو شفت الشرطى وهو بيعاقب الجانى او المجرم او المتحرش باسرتك او احد البلطجيه .. وهتكون مبسوط اكتر لو شفت الشرطى وهو بيجيبلك حقك  وبيعاقب الجانى ..بس ياريت حضره الضابط يفرق بين الصالح والطالح....

رابعا :- التوقيف (التــــــحرى) :-

·       ماذا يعنى التحرى ؟ التوقيف التحرى ؟

مافيش حاجه اسمها حد يقبض عليه أو يتحبس على زمه تحريات ضابط الشرطه او بمزاجه ... لكن من حق الشرطه توقف الناس اللى بيحطوا نفسهم فى مواقف الشك والريبه . ...ومن حق ضابط الشرطه يسالك عن أسمك وعنوانك واريح فين وجى منين علشان يتاكد من شخصيتك .. لكن مش من حقه يخده على القسم ولا يقبض عليه أو يفتشه أو يستعمل معاه القوه أو يمس كرامته او يعتدى على حريته .

·       اعمل ايه لو حد من الشرطه وقفنى وقاللى إحنا مشتبهين فيك ؟

قانون الاشتباه انتهى من سنه 1993 بعد ما حكمت المحكمه الدستويه بالغاء الاشتباه فى الناس , يعنى تقولها بكل ذوق وادب أن قانون الاشتباه اتلغى  ومش من حقك تاخدنى إشتباه .

                 

·       ماذا تقصد بمعنى انى احط نفسى فى موقف شك وريبه ؟

يعنى مثلا ماشى بالليل متاخر وبتحاول تفتح ابواب العربيات أو بتتفحص كوالين ابواب المحلات او شايل حاجه وبتتلفت يمين وشمال وفوق وتحت او على ملابسك اى أثار للدماء او بتحاول تجرى وتهرب لما بتسمع صوت عربيه الشرطه او واضح جدا انك سكران او بتدخن ممنوعات  او واضح انك شايل سلاح  ما  او   او .

·       ممكن اعمل ايه لو كان فى حد موصى عليا ولما طلعت البطاقه حاول ياخدنى تحرى على القسم  ؟

زى ما قلنا مافيش حاجه اسمها تحرى او يوديك على القسم لو كان شاكك فيك ممكن يتصل بالمكتب ويعرف إذا كان عليك أى احكام او عليك حكم ضبط واحضار  ( كل حاجه على الكمبيوتر ) لو كان عليك حكم يبقى من حقه يقبض عليك ويفتشك وياخدك على القسم .

·       هاتصرف ازاى لو طلبوا من اطلع اللى فى جيوبى وحاولوا يفتشونى بعد ما شافوا بطاقتى وانا راجل سليم معليش اى أحكام او مخالفات ؟

لو أنت انسان سليم ومعلكشى اى قضايا او احكام ولا ممسوك متلبس بجريمه , قوله بكل زوق حضرتك طلبت البطاقه وشفتها .. وسيادتك رجل قانون وعارف أكتر منى إن التفتيش محتاج إذن من النيابه ولو فتشتنى بدون إذن النيابه هيكون اجراء مش قانونى , وانا متاكد أن رجل القانون لا يخالف القانون أبدا .

·       ممكن اعمل ايه لو أستخدم القوه وخلى العساكر اللى معاه تمسكنى وتفتشنى بالعافيه ؟

هذا إجراء غير قانونى ومش من حقه , والضابط لو حس إنك عارف حقوقك كويس وإنك هتشتكيه للمامور ولمفتش الداخليه ... اللى طبعا مش هيوافقوا ابدا على اللى حلص معاك وإنك مش هتتنازل عن حقك ابدا مهما حصل , .....  حاول يكون معاك شهود من الناس اللى ماشيين فى الشارع وشافوا اللى حصل معاك ..

وكن حريصا ومتغلطش أو يستفزك علشان ميعملكش محضر تعدى على موظف أثناء تاديه عمله , وحينما تصل الى القسم  تعمله محضر إنه قبض عليك وفتشك وحجزك بدون وجه حق .

·       اعمل ايه لو الضابط شتمنى وركبنى البوكس بالعافيه وحجزنى  ؟

لو الضابط حس إنك رجل بتتكلم معاه بجد ومش خايف منه وانك فاهم حقوقك كويس , هيفكر كتير قبل ما ياخدك على القسم من اساسه , لكن لو خدك على القسم تطلب مقابله المامور أو نائب المامور واشرح له الموضوع وكيف تم القبض عليك وفتشك من غير داعى وبدون رضاك وبدون وجه حق وانك لجات له علشان سياته المسؤل ( رئيس القسم )  وهتلاقى المامور راجل كبير ومسئول وفاهم حقوق الناس كويس وهيحاسب الضابط اللى غلط معاك ولازم تصمم تعمل محضر باللى حصل ولو رفض عمل محضر ممكن تعمله محضر عند مفتش الداخليه فى مديريه الامن  أو تطلع على النيابه .

·       اعمل ايه لو الضابط حبسنى ظلم وبدون وجه حق   ؟

حاول تخلى أى حد من قرايبك يبعتوا تلغرافات على وزير الداخليه ولمفتش الداخليه والنائب العام ورئيس النيابه , ويقولوا فى التلغراف أنك مقبوض عليك فى القسم بدون سبب وبدون وجه حق وياريت تكتب اسم الضابط أو الامين اللى قبض عليك  ...  وهتخرج لو ماكنشى عليك اى قضايا أو احكام

·       إزاى أتصل بأهلى واول حاجه بيخدوها فى القسم التليفون  ؟

من حقك تتصل ( ماده 139  من قانون الاجراءات الجنائيه ) , او اى حد من العساكر ممكن تخليه يتصل باهلك

·       حافظ على حقوقك مش من حق أى حد إنه يهينك أو يعتدى على جسمك أو كرامتك واى حد يتجاوز حدوده مهما كان يتحاسب على غلطه فى حقك , ولازم تتمسك بحقك وتشتكى أى حد انتهك حقوقك أو اهانك أو شتمك او ضربك أو حبسك أو فتشك بدون وجه حق .

إذا اعجبتك هذه المقاله  يرجى مشاركتها مع الاخريين حتى تعم الفائده , فالشمعه لا تخسر شيئا حينما تشعل شمعه أخرى .