علشان متضربش على قفاك " الفصل الاول"

"علشان متضربش على قفاك " الفصل الاول

مقدمه لابد منها :-

·        فى الفصول التاليه نقدم لحضراتكم ملخص لبعض الافكار التى وردت فى كتاب العقيد عمر عفيفى عن كتابه " علشان متنضربش على قفاك " له منا كل الشكر والتقدير والاحترام , وايضا بعض المواثيق الدوليه لحقوق الانسان .

·        يعنى ببساطه إزاى محدش يلهف حقك , وتعرف كويس ايه اللى ليك وإللى عليك فى مركز الشرطه وتعرف حقوقك التى يكفلها لك  الدستور والقانون  ..

·        يعنى من غير مقدمات كتيره تعمل ايه لو حد وقفك فى الشارع وقالك بطاقتك , وكمان لو حاول يفتشك تعمل ايه , وكمان لو حاول ياخدك على القسم تروح معاه ولا لا وايه حقوقك وصلاحياته  .

·        يعنى ببساطه هتتصرف ازاى لو حد من الشرطه جه وخبط على باب بيتك ده لو مكانشى اتكسر وقالك عندنا امر بالتفتيش ...هتعمل ايه ؟ ... هتعمل ايه ؟  لو كان فتش وتعنت فى تكسير محتويات البيت .. أو انك اكتشفت ان فلوس او شئ ثمين أختفى بعد التفتيش هتعمل ايه ؟؟ ... كمان إذن التفتيش شكله إيه ومختوم ولا لا

·         تعمل ايه لو حاول حد يفتش بنتك او زوجتك تفتيش زاتى ... وهتعمل ايه ؟ لو اخذ امك او بنتك مكانت لحد ما ترجع وتسلم نفسك ليهم .

·        وكمان مين من حقه يشوف رخصه القياده ومين من حقه يسحبها .. وهل لازم  تاخذ ايصال بالرخصه .

·        هتتصرف إزاى  لو حد إتحرش  باسرتك او باختك او زوجتك أو بنتك ..

·        تعمل ايه لو حد من الشرطه شتمك او ضربك او أهانك ...وهتعمل ايه ؟ لو حاول يلفق ليك تهمه مثلا يعنى حاول يتهمك بانك حرضت على بناء سد النهضه أو انك مسؤل مسؤليه كامله عن تغير المناخ على كوكب الارض مثلا يعنى !!!!

·        ماذا تعرف عن  حقوقك فى قسم الشرطه ... وازاى تعمل محضر لضابط شرطه معتدى

·        هتتصرف ازاى  ؟ لو احد اقرباءك مات جوه القسم من الدلع والرفاهيه اللى شافهم  وإزاى تجيب حقه ؟

·        اكيد سمعت عن حقوق الانسان .. وطبعا الكلام ده مش للى لابسين بدل وكرافتات واللى عارفين حقوقهم قوى .. وعلشان كده معمولهم الف حساب لقفــــاهــــم ... لكن كلامنا للناس الغلابه اللى مش عارفه حقها فين .. ولازم تعرفه بالضبط علشان لو مدورتش على حقك وسعيت له لان تجد من يسعى لك فى حقك , فلا تلوم إلا نفسك , لان زى المال السايب ما بيعلم السرقه كذالك الحق السايب يعلم الفساد والفرعه للطرف الاخر .

·       كمان برضو نشكر رجال الشرطه على اللى بتعمله كتير منهم بيضحوا بحياتهم علشانك انت وبيتك تعيشوا فى سلام ... يعنى ببساطه أنت هتكون مبسوط لو شفت الشرطى وهو بيعاقب الجانى او المجرم او المتحرش باسرتك او احد البلطجيه .. وهتكون مبسوط اكتر لو شفت الشرطى وهو بيجيبلك حقك  وبيعاقب الجانى ..بس ياريت حضره الضابط يفرق بين الصالح والطالح....

اولا :- الاستفسار عن بطاقتك الشخصيه:-

·       مين من الشرطه من حقه يشوف بطاقتى ؟

الضابط وامين الشرطه وكمان حتى الغفير من حقهم يشوفو بطاقتك علشان يتاكدوا من شخصيتك والمواطن السليم مايخفش ولازم توريهم بطاقتك لو حد منهم طلب يشوفها , لان القانون أدى الحق ده للشرطه.انها تطلب بطاقتك وتشوفها فى اى وقت نهار او ليل .

·       هتعمل ايه  لو حد من الشرطه وقفنى فى الشارع وقالى فين بطاقتك يا باشا ؟

لازم تعرف هو مين الاول ... يعنى قوله ممكن أتشرف مين حضرتك .

      

·       هل ده معقول إن الضابط اوالامين أو حتى المخبر هيطلع لى الكارنيه بتاعه أكيد هيشتمنى أو هيضربنى ؟

من حقك تعرف مين اللى بيسألك , مش جايز يكون نصاب أو أحرامى عايز يثبتك أو يقلبك ... والضابط لو حاسس أنك واثق من نفسك وعارف حقوقك كويس ...مش هيشتمك او يضربك لكن هيعاملك كويس وبكل احترام  ... ومحدش يشوف بطاقتك إلا إذا شوفت الكارنيه ,واتاكدت انه ضابط شرطه أو امين شرطه ... لان القانون الزم الشرطه انهم يعرفوا الناس بشخصيتهم

ذو ما بنشوف فى الافلام الاجنبى إن الضابط مجبر أنه يعرض كارنيه الشرطه على المواطن قبل ما يتكلم معاه علشان ده حق المواطن انه يعرف مين اللى بيتكلم معاه وعلشان كده بتشوف ان الضباط معلقين الكارنيه من خارج البدله فى الاجنبى اللى بنشوفه فى الافلام ).

لكن خلى فيه شويه ذكاء وتفرق بين ظابط واقف امام قسم شرطه ولابس ميرى ومعاه بوكس شرطه , وبين واحد واقف فى حته مقطوعه وعامل كمين بعربيه اجرة وشكله مش ولابد ...

·       ممكن أعرف ايه هو شكل كارنيه الشرطه ؟

·       هل من حقى أسال على كارنيه الضابط حتى لو كان لابس ميرى ؟

من حقك تشوف كارنيهه وتتعرف على شخصيته سواء كان لابس ميرى أو ملكى .. لان فيه حراميه كتير بيلبسوا ملابس ضباط ... وبقشطوا الشعب وبيسؤا لسمعه ضباط الشرطه .

·       إيه  عقوبه اللى يتمسك فى الشارع من غير بطاقه ؟

يتعمل له مخالفه عدم حمل بطاقه وغرامتها متقلش عن 100 ج ولا تزيد عن 200 ج لكن ميتحبسش ( ماده 68 من قانون الاحوال المدنيه لسنه 1994 )

·       هل من حق الضابط أنه يفتشنى او يحبسنى لو معيش بطاقه فى الشارع ؟

مش من حقه لان عدم حمل بطاقه مجرد مخالفه عقوبتها الغرامه , ومش من حقه لا التفتيش ولا الحبس فى حاله عدم حمل بطاقه .وحاول تتصل باحد اقاربك يجبلك البطاقه بدل ما تدفع المخالفه .

·       اعمل ايه لو حد من الشرطه بعد ما شاف بطاقتى حطها فى جيبه  وقالى روح على بيتك ؟

ممنوع اى حد يسحب بطاقتك او يحتفظ بيها , لانه لو عمل كده يبقى ارتكب جريمه فى حقك , والقانون يعاقبه وتروح تعمله محضر فى القسم انه اخذ بطاقتك بدون سبب.

·       ايه السن اللى بتطلع فيه البطاقه ؟

يمكنك عمل بطاقه من مكتب السجل المدنى خلال فتره 6 شهور من بلوغك سن 16 سنه

·       ما هى عقوبه اللى تجاوز السن ومعملشى بطاقه شخصيه ؟

يتحبس مده لا تذيد عن 6 شهور او بغرامه لا تقل من 100 ج ولا تذيد عن 500 ج

·       أعمل ايه لو ضاعت بطاقتى أو اتسرقت او اتحرقت او اتكسرت ؟

الافضل أولا انك تعمل محضر بدل فاقد او تالف علشان تخلى مسؤليتك ... وبعدين تطلع بدل فاقد أو تالف من السجل المدنى اللى انت ساكن فيه خلال فتره 15 يوم من الواقعه .

·       يحصل إيه لو لقيت بطاقتى القديمه واستعملتها بعد ما طلعت بدل فاقد ؟

اللى يستعمل بطاقتين فى وقت واحد يتحبس مده لا تذيد عن سنه او بغرامه مده متقلش عن 200 ج ولا تذيد عن 500 ج .

·       اعمل ايه لو حد لقى بطاقتى واستعملها ؟

كل اللى يستعمل بطاقه شخص اخر يتحبس مده لا تقل عن سنه وبغرامه لا تقل عن 500 ج ولا تذيد عن 1000ج او واحده من العقوباتين , وكمان اللى يعطى بطاقته لحد غيره علشان يستعملها يتعاقب بنفس العقوبه .

·       هل لازم يكون معايا بطاقه لو عاوز اشتغل فى اى وظيفه ؟

لازم يكون معاك بطاقه وتكون ساريه المفعول , لان محدش هيشغلك من غير بطاقه , لان اى صاحب عمل يشغل عنده اى فرد بدون من غير  بطاقه يتحبس مده لا تذيد عن ثلاثه شهور أو بغرامه لا تقل عن 200 ج ولا تذيد عن 500 ج

·       أعمل ايه لو كنت مسافر وعاوز ابيت فى فندق بس مش معايا بطاقه ؟

محدش يقدر يسكنك  فى اى فندق لان مدير الفندق لو سكن عنده نزيل من غير بطاقه يتحبس مده لا تقل عن 6  شهور او يدفع غرامه لا تقل عن 1000ج  ولا تذيد عن 3000 ج

إذا اعجبتك هذه المقاله يرجى  مشاركتها مع الاخريين حتى تعم الفائده , فالشمعه لا تخسر شيئا حينما تشعل شمعه أخرى .